ޝައިޠާނާގެ ކިބައިން ރައްކާތެރިވާނެ ދިހަ ގޮތެއްބޭކާރު ބެލުންތަކާއި، ބޭކާރު ވާހަކަދެއްކުމާއި، ބޭކާރު ގޮތުގައި ކެއުމާއި، ބޭކާރު ގޮތުގައި މީހުންނާ އެކު އުޅުމުން ދުރުހެލިވުން

إنَّ الحَمْدَ لِلَّهِ، نَحْمَدُهُ، وَنَسْتَعِينُهُ، وَنَسْتَغْفِرُهُ، وَنَعُوذُ بِاللَّهِ مِنْ شُرُورِ أَنْفُسِنَا، وَمِنْ سَيِّئَاتِ أَعْمَالِنَا، مَنْ يَهْدِهِ اللَّهُ فَلاَ مُضِلَّ لَهُ، وَمَنْ يُضْلِلْ فَلاَ هَادِيَ لَهُ، وَأَشْهَدُ أَنْ لاَ إِلَهَ إِلاَّ اللَّهُ وَحْدَهُ لاَ شَرِيكَ لَهُ، وَأَشْهَدُ أَنَّ مُحَمَّدًا عَبْدُهُ وَرَسُولُهُ، صَلَّى اللَّهُ عَلَيْهِ وَعَلَى آلِهِ وَأَصْحَابِهَ وَمَنْ تَبِعَهُمْ بِإِحْسَانٍ إِلَى يَوْمِ الدِّينِ، وَسَلَّمَ تَسْلِيمًَا كَثِيرًَا. أمَّا بَعْدُ:

ދިހަވަނައީ ބޭކާރު ބެލުންތަކާއި، ބޭކާރު ވާހަކަދެއްކުމާއި، ބޭކާރު ގޮތުގައި ކެއުމާއި، ބޭކާރު ގޮތުގައި މީހުންނާ އެކު އުޅުމުން ދުރުހެލިވުމެވެ. އެހެނީ ޝައިޠާނާ އާދަމުގެ ދަރިޔާގެ މައްޗަށް ބާރު ހިންގާ އަދި އޭނާގެ މަޤްޞަދުތައް ޙާޞިލުކުރަނީ މި ހަތަރު ދޮރުންކުރެ ދޮރަކުންނެވެ. ބޭކާރު ބެލުންތަކަކީ އޭގެ ސަބަބުން (ނުރަނގަޅު ކަންކަން) ރަނގަޅު ކަންކަންކަމުގައި ހެދުމަށް ގޮވާލާ ކަމެކެވެ. އަދި ބަލާ އެއްޗެއްގެ ސޫރަ ހިތަށް ވަދެ، އެއާމެދު މަޝްޣޫލުވެ، އަދި އެ އެއްޗެއް ހޯދުމަށް ވިސްނާ ފިކުރުކުރަން ފަށައެވެ. ފަހެ، ފިތުނައިގެ ފެށުން ވަނީ ބޭކާރު ބެލުންތަކުންނެވެ. (މި ކަން ބަޔާންކުރައްވައި) ނަބިއްޔާ صَلَّىٰ اللهُ عَلَيْهِ وَسَلَّمَ ޙަދީޘްކުރެއްވިއެވެ.

ބޭކާރު ވާހަކަދެއްކުމާ މެދު ދަންނައެވެ. ފަހެ، އެއީ އަޅާއަށް ނުބައިކަމުގެ އެތަކެއް ދޮރުތަކެއް ހުޅުވާލާ ކަމެކެވެ. އެ ހުރިހާ ދޮރަކީ ޝައިޠާނާ ވަންނަ ދޮރުތަކެވެ. ވުމާ އެކު، ބޭކާރު ވާހަކަދެއްކުމުން ދުރުހެލިވެއްޖެ ނަމަ، އެ ހުރިހާ ދޮރެއް ބަންދުވެއެވެ. ބުނެލާ އެންމެ ބަހަކުން ކިތައް ހަނގުރާމަ ފެށިފައި ވޭ ހެއްޔެވެ!؟ ނަބިއްޔާ صَلَّىٰ اللهُ عَلَيْهِ وَسَلَّمَ މުޢާޛު رَضِيَ اللهُ عَنْهُއަށް ޙަދީޘްކުރެއްވިއެވެ.

އަދި އިމާމު ތިރުމިޛީ (ނޔވ 271) ގެންނަވާފައ ވެއެވެ. އަންޞާރުންގެ ތެރެއިން ބޭކަލަކު އަވަހާރަވުމުން ޞަޙާބީ ބޭކަލުންގެ ތެރެއިން ބައެއް ބޭކަލުން ވިދާޅުވިއެވެ: އޭނާއަށް އުފާވެރިކަން ހުއްޓެވެ!" ދެން ނަބިއްޔާ صَلَّىٰ اللهُ عَلَيْهِ وَسَلَّمَ ޙަދީޘްކުރެއްވިއެވެ.

ގިނަ ފާފަތައް އުފަންވެ ފެށެނީ ބޭކާރު ވާހަކަ ދެއްކުމާއި، ބޭކާރު ބެލުންތަކުގެ ސަބަބުންނެވެ. މި ދެކަމަކީ ޝައިޠާނާ ވަންނަ އެންމެ ފުޅާ ދޮރުތަކެވެ. މި ދެ ދޮރުންކުރެ ދޮރެއް ޝައިޠާނާ ހަލާކުކޮށްލައި ވަދެއްޖެ ނަމަ، އިންސާނާ މިކަމުން ދުވަހަކު ފޫހިވުމެއް އަދި ބަނޑު ފުރުމެއް ނުވެއެވެ. މިއީ ބަނޑުހައިހޫނުކަމާ ޚިލާފަށެވެ. އެހެނީ އިންސާނާ ކައިގެން ބަނޑު ފުރިއްޖެ ނަމަ، ދެން އިތުރަށް އެއްޗެއް ކެއުމުގެ އެދުމެއް އަދި ބޭނުމެއް ނުހުރެއެވެ. ނަމަވެސް ލޮލާއި ދޫ ހިފެހެއްޓުމެއް ނެތި ބޭނުންގޮތަކަށް ދޫކޮށްލައިފިނަމަ، ބޭކާރު ބެލުމާއި ވާހަކަ ދެއްކުމުން އެ ދެ ގުނަވަން ފޫހިވުމެއް އަދި ވަރުބަލިވުމެއް ވެސް ނުވެއެވެ. އެހެންމެ މި ދެ ގުނަވަނުގެ ސަބަބުން ކުރިމަތިވާ ނުބައިކަން ބޮޑުވެފައި ގިނަގުނައެވެ. ސަލަފުންގެ ބޭކަލުން ބޭކާރު ވާހަކަ ދެއްކުމާ ދުރުހެލިވުމަށް ބާރުއަޅާ ފަދައިން، ބޭކާރު ބެލުމާ ދުރުހެލިވުމަށް ވެސް ބާރުއަޅުއްވައި އުޅުއްވިއެވެ. އެ ބޭކަލުން ވިދާޅުވާ ކަމުގައިވިއެވެ.

އަދި ބޭކާރު ކެއުމާ މެދު ދަންނައެވެ. ފަހެ، އެއީ އިންސާނާގެ ހަށިގަނޑުގެ ގުނަވަންތައް ފާފަތަކަށް އަރައިގަތުމަށް ހިތްވަރުދީ ބާރުދޭ ކަމެކެވެ. އަދި އެއީ ހެޔޮ ޢަމަލުތައް ކުރުމަށް އެ ގުނަވަންތަކަށް ބަރުކަމާ ކަންނެތްކަން ލިއްބައިދޭ ކަމެކެވެ. ނުބައިކަމެއްގެ ގޮތުގައި ތިބާއަށް މި ދެ ކަންތައް ފުދޭނެއެވެ!

ޙާޖަތްޖެހިގެންވާ މިންވަރަށް ވުރެ އިތުރަށް ބަނޑުފުރުމާއި ބޭކާރު ކެއުމުގެ ސަބަބުން ކިތައް ފާފަ ކުރެވިފައިވޭ ހެއްޔެވެ!؟ އަދި ކިތައް ހެޔޮ ޢަމަލުތަކަށް އެ ކަން ހުރަސްއަޅާފައިވޭހެއްޔެވެ؟ ފަހެ ބަނޑުގެ ނުބައިކަމުން ރައްކާތެރިވެއްޖެ މީހާ، ބޮޑު ނުބައިކަމަކުން ރައްކާތެރިވެއްޖެކަން ކަށަވަރެވެ. ޝައިޠާނާ އިންސާނާގެ މައްޗަށް އެންމެ ބޮޑަށް ވެރިވެގަންނަނީ އޭނާ ޙާޖަތްޖެހިގެން ވާ މިންވަރަށް ވުރެ އިތުރަށް ބަނޑުފުރުގެ ސަބަބުންނެވެ. ބައެއް

އަދި ނަބިއްޔާ صَلَّىٰ اللهُ عَلَيْهِ وَسَلَّمَ ޙަދީޘްކުރެއްވިއެވެ.

ކެއުމުގައި ހައްދުފަހަނަޅައިދިއުމަކީ ﷲ ހަނދުމަކުރުމުން އިންސާނާގެ ހިތް ޣާފިލުކޮށްލާކަމެކެވެ. އިންސާނާގެ ހިތް އެންމެ ހިނދުކޮޅަކަށް ވެސް ﷲ ހަނދުމަކުރުމުން ޣާފިލުވެއްޖެ ނަމަ، ޝައިޠާނާ އޭނާގެ މައްޗަށް އަރައިގަނެ، އޭނާއަށް ވަޢުދުވެ، އުންމީދުތައް ދައްކައި، (ހަވާނަފުސުގެ) އެދުންތަކަށް ހިތްވަރުދީ ހަދައެވެ. ދެން އިންސާނާ ޝައިޠާނާ ދެއްކި ކޮންމެ މަގެއްގައި ދުއްވައިގަނެއެވެ. ފަހެ އިންސާނާގެ ބަނޑުފުރިއްޖެ ނަމަ، އެ ނަފްސު ޙަރަކާތްތެރިވެ، ދަތުރުކޮށް، ހަވާނަފުސުގެ އެދުންތަކުގެ ދޮރުތަކަށް ވަދެއެވެ. ނަމަވެސް މިއާ ޚިލާފަށް އިންސާނާ ބަނޑުހައިވެއްޖެ ނަމަ، އެ ނަފްސު ހަމަޖެހި، ކިޔަމަންވެ، މަޑުމައިތިރިވެއެވެ.

ބޭކާރު އެއްވުންތަކާ މެދު ދަންނައެވެ. ޙާޖަތްޖެހިގެން ވާ މިންވަރަށް ވުރެ އިތުރަށް މީހުންގެ ތެރޭ އެކުވެ އުޅުމަކީ ހުރިހާ ނުބަޔަކަށް މަގުދައްކާ، ފިލުވައިލަން އުނދަގޫ ވަބާއެކެވެ. މިކަމުގެ ސަބަބުން ކިތައް ނިޢުމަތް ގެއްލިފައިވޭތޯއެވެ؟ އަދި ކިތައް ޢަދާވަތްތެރިކަން އުފެދިފައިވޭތޯއެވެ؟ އަދި ހިތްތަކުގައި ކިތައް ނުތަނަވަސްކަމާއި ދެކޮޅުވެރިކަން އުފެދިފައިވޭތޯއެވެ؟ ބިމުގައި ހަރުލާފައި ވާ ފަރުބަދަތައް ނެތިދިޔަ ނަމަވެސް ހިތްތަކުގައި ހިނގާ އެ ކަންކަމެއް ނެތިގެނެއް ނުދާނެއެވެ. ފަހެ، ޙާޖަތްޖެހިގެން ވާ މިންވަރަށް ވުރެ އިތުރަށް މީހުންގެ ތެރޭ އެކުވެ އުޅުމަކީ ދުނިޔެއާއި އާޚިރަތުގެ ހަލާކެވެ. އިންސާނާ މީސްތަކުންނާ އެކު އުޅުމުގައި، ޙާޖަތްޖެހިގެންވާ މިންވަރަށް ނޫންގޮތަކަށް އުޅުން އެކަށީގެނެއް ނުވެއެވެ.

ފަހެ، މުޅި ދުނިޔޭގެ ހަލާކުގެ އަސްލުކަމަށްވާ މި ހަތަރު ކަންތަކުން، އެއީ ބޭކާރު ބެލުންތަކާއި، ބޭކާރު ވާހަކަ ދެއްކުމާއި، ބޭކާރު ގޮތުގައި ކެއުމާއި، ބޭކާރު ގޮތުގައި މީހުންނާ އެކު އުޅުމުން ރައްކާތެރިވެއްޖެ މީހާ، އަދި ޝައިޠާނާގެ ކިބައިން ރައްކާތެރިވުމަށް އިސްވެ ބަޔާންވެ ދިޔަ ނުވަ ޤަވާޢިދުގައި ރަނގަޅަށް ހިފައިފި މީހާ، ހެޔޮ ތައުފީޤުން އޭނާއަށް ލިބެންވީ ނަޞީބުގައި ހިފައިފިކަން ކަށަވަރެވެ. އަދި އޭނާގެ ނަފުސުގެ މައްޗަށް ނަރަކައިގެ ދޮރުތައް ބަންދުކޮށް ރަޙުމަތުގެ ދޮރުކޮޅުތައް ހުޅުވައިފިއެވެ. އަދި އޭނާގެ ފާޅުވެގެންވާ ބައިތަކާއި ފޮރުވިފައިވާ ބައިތައް އާބާދުކޮށްފިއެވެ. އަދި މަރުވާ ވަޤުތު މި ބަޔާންކުރެވުނު ބޭސްފަރުވާގެ ނަތީޖާއަށް ޝުކުރުވެރިވާން ގާތްވެއްޖެއެވެ. ފަހެ މަރުވާ ވަޤުތު މީސްތަކުން ތަޤްވާވެރި މީހާއަށް ހެޔޮބަސް ބުނެއެވެ. އަދި މެންދަމު ދަތުރުކޮށް (މަންޒިލަށް ވާޞިލުވި) މީހުންނަށް، ހެނދުނުވުމުން ތަޢުރީފުކުރެއެވެ.

މިހާ ހިސާބުން އަޅުގަނޑު ތަރުޖަމާކުރުމަށް ގަސްދުކުރި މިންވަރު ނިމުނީއެވެ. والحَمدُ لِلَّهِ ربِّ العالَمينَ. وصَلَّى اللهُ وسَلَّمَ عَلَى نَبِيِّنَا مُحَمَّدٍ، وَعَلَى آلِهِ وَأَصْحَابِهِ أَجْمَعِيْنَ.